സമാന്തര പ്രപഞ്ചങ്ങള്‍

ഉള്ളടക്കം വായിച്ചു കേൾപ്പിക്കുക : ശബ്ദം_10_സെക്കന്റിൽ 🔊

Other Universes are pulling on our Universe

അനന്തവും അതിരുകളില്ലാത്തതുമായ ഒരു ഏക പ്രപഞ്ചത്തിലാണോ അതോ ശതകോടിക്കണക്കിനുള്ള പ്രപഞ്ചങ്ങില്‍ ഒന്നുമാത്രമായ ഒരു കുമിളാ പ്രപഞ്ചത്തിലാണോ നാം ജീവിക്കുന്നത്? പ്രവചനങ്ങള്‍ക്കും പരികല്‍പ്പനകള്‍ക്കും വിരാമമിടാന്‍ സമയമായി. നിരവധി പ്രപഞ്ചങ്ങളുടെ(multiverse) സാന്നിധ്യം അരക്കിട്ടുറപ്പിക്കുന്ന തെളിവുകള്‍ ഇതാദ്യമായി ശാസ്ത്രലോകം ഗൗരവമായി ചര്‍ച്ച ചെയ്യുകയാണ്. യൂറോപ്യന്‍ സ്‌പേസ് ഏജന്‍സിയുടെ ‘കോസ്മിക് ടൈം മെഷീന്‍’ എന്ന് വിളിക്കുന്ന പ്ലാങ്ക് സ്‌പേസ് ക്രാഫ്റ്റ് പരഭാഗ വികിരണങ്ങളില്‍(Cosmic Microwave Background) നടത്തിയ പഠനഫലം അപഗ്രഥിച്ച ശാസ്ത്രജ്ഞരാണ് അത്ഭുതകരമായ ഒരു കണ്ടെത്തലിന്റെ തൊട്ടടുത്തെത്തിയിരിക്കുന്നത്. 2013 ജൂണ്‍മാസത്തില്‍ പ്ലാങ്ക് സ്‌പേസ്ക്രാഫ്റ്റ് നിര്‍മിച്ച പരഭാഗ വികിരണങ്ങളുടെ മാപില്‍ കാണപ്പെട്ട അപശ്രുതിക്ക് കാരണം സമാന്തര പ്രപഞ്ചങ്ങള്‍ സൃഷ്ടിക്കുന്ന ഗുരുത്വ വലിവുകൊണ്ട് മാത്രമാണെന്ന നിഗമനത്തിലാണ് ശാസ്ത്രജ്ഞര്‍ എത്തിയരിക്കുന്നത്. 2014 ഒക്ടോബര്‍ 24നാണ് പഠനഫലം പുറത്തുവിട്ടിരിക്കുന്നത്.

പെട്ടെന്ന് കേള്‍ക്കുമ്പോള്‍ ഒരു കിറുക്കന്‍ ആശയമാണിതെന്ന് തോന്നുന്നവര്‍ക്ക് കേംബ്രിഡ്ജ് യൂണിവേഴ്‌സിറ്റിയിലെ ആസ്‌ട്രോഫിസിക്‌സ് പ്രൊഫസായ ജോര്‍ജ് എഫ്‌സ്താതിയോക്ക് കൃത്യമായ മറുപടിയുണ്ട്.ഒരു മൂന്ന് തലമുറകള്‍ക്ക് മുമ്പ് മഹാവിസ്‌ഫോടന സിദ്ധാന്തമെന്ന് കേട്ടവരും ഇതിലേറെ നെറ്റി ചുളിച്ചിട്ടുണ്ടായിരുന്നു. നമുക്ക് തെളിവുകള്‍ ലഭിച്ചുകൊണ്ടിരിക്കുകയാണ്. ഓരോ നിമിഷവും പ്രപഞ്ചത്തേക്കുറിച്ചുള്ള നമ്മുടെ ധാരണ തിരുത്തപ്പെട്ടുകൊണ്ടിരിക്കുകയാണ്.

പ്ലാങ്ക് സ്‌പേസ്ക്രാഫ്റ്റ് നിര്‍മിച്ച സ്‌കൈ മാപിലെ ദക്ഷിണ അര്‍ധവൃത്തത്തില്‍ പരഭാഗ വികിരണങ്ങളുടെ സാന്ദ്രതയില്‍ ഗണ്യമായ വര്‍ധനവുണ്ടാകാന്‍ കാരണം സമാന്തര പ്രപഞ്ചങ്ങള്‍ സൃഷ്ടിക്കുന്ന ഗുരുത്വ വലിവുകാരണമാണെന്നാണ് പ്ലാങ്ക് ശാസ്ത്രജ്ഞര്‍ അവകാപ്പെടുന്നത്. 2005ല്‍ നോര്‍ത്ത് കരോലിന യൂണിവേഴ്‌സിറ്റിയിലെ സൈദ്ധാന്തിക ഭൗതിക ശാസ്ത്രജ്ഞയായ ലോറ മെര്‍സിനിയും കാര്‍നെഗി മെലണ്‍ യൂണിവേഴ്‌സിറ്റിയിലെ പ്രൊഫസറായ റിച്ചാര്‍ഡ് ഹോള്‍മാനും പരഭാഗ വികിരണങ്ങളിലുണ്ടാകുന്ന അപശ്രുതിക്ക് കാരണം സമാന്തര പ്രപഞ്ചങ്ങളുടെ സാന്നിദ്ധ്യമാണെന്ന് പ്രവചിച്ചിരുന്നു. ഇപ്പോള്‍ പ്ലാങ്ക് സ്‌പേസ്ക്രാഫ്റ്റില്‍ നിന്ന് ലഭിച്ചുകൊണ്ടിരിക്കുന്ന വിവരങ്ങള്‍ തങ്ങളുടെ പ്രവചനം യാഥാര്‍ഥ്യമാണെന്ന് തെളിയിക്കുകയാണെന്നാണ് ഡോ. മെര്‍സിനി അവകാശപ്പെടുന്നത്. ഭീമന്‍ തമോഗര്‍ത്തങ്ങളും മറ്റ് ആക്ടീവ് ഗാലാക്ടിക് ന്യൂസ്ലിയസുകളും സൃഷ്ടിക്കുന്ന ശക്തമായ ഗുരുത്വക്ഷേത്രം പരഭാഗ വികിരണങ്ങളില്‍ അസ്വസ്ഥതകള്‍ സൃഷ്ടിക്കുന്നുണ്ടാകാമെന്ന പരികല്‍പ്പന ഇനി നിലനില്‍ക്കില്ലെന്ന് തന്നെയാണ് നാസയിലെ ശാസ്ത്രജ്ഞരും പറയുന്നത്. ഗാലക്‌സി ക്ലസ്റ്ററുകളുടെ പലായന പ്രവേഗത്തിലുണ്ടാകുന്ന ഗണിത പ്രശ്‌നങ്ങള്‍ പരിഹരിക്കാന്‍ കോസ്‌മോളജിസ്റ്റുകള്‍ ഉപയോഗിക്കുന്ന ‘ഡാര്‍ക്ക് ഫ്‌ളോ’ പ്രതിഭാസം പുനപരിശോധനക്ക് വിധേയമാക്കേണ്ടതാണ്ടെന്നും പ്ലാങ്ക് ഡാറ്റ അപഗ്രഥിച്ച ശാസ്ത്രജ്ഞര്‍ വിലയിരുത്തുന്നു. ‘ഡാര്‍ക്ക് ഫ്‌ളോ’ പ്രതിഭാസം എന്നൊന്നില്ലെന്നാണ് പ്ലാങ്ക് സ്‌പേസ് -ക്രാഫ്റ്റ് നല്‍കുന്ന വിവരം.

പരഭാഗ വികിരണങ്ങള്‍(Cosmic Microwave Background)

പദാര്‍ഥത്തിന്റെ അനന്തമായ മര്‍ദ, താപ, സാന്ദ്ര അവസ്ഥയില്‍ നിന്നുണ്ടായ ധ്രുത വികാസത്തേത്ത തുടര്‍ന്നാണ് ഈ പ്രപഞ്ചമുണ്ടായതെന്നാണ് മഹാവിസ്‌ഫോടന സിദ്ധാന്തം പറയുന്നത്. ഏകദേശം 1382 കോടി വര്‍ഷങ്ങള്‍ക്ക് മുമ്പുണ്ടായ ഈ മഹാവിസ്‌ഫോടനത്തെ തുടര്‍ന്ന് പ്രപഞ്ചം വികസിക്കാനാരംഭിച്ചു. ആ വികാസം ഇപ്പോഴും തുടര്‍ന്നുകൊണ്ടിരിക്കുകയാണ്. പ്രപഞ്ചത്തിന്റെ ഇപ്പോഴത്തെ ശരാശരി തപാനില 2.725 കെല്‍വിന്‍(-270.275 ഡിഗ്രി സെല്‍ഷ്യസ്) ആണെന്ന് കണ്ടെത്തിയിട്ടുണ്ട്.ഈ താപനിലയുമായി ബന്ധപ്പെട്ട വികിരണങ്ങളാണ് പരഭാഗ വികിരണങ്ങള്‍ എന്നറിയപ്പെടുന്നത്. പ്രപഞ്ചത്തിന്റെ പ്രായമളക്കുന്നതും ശൈശവപ്രപഞ്ചത്തിന്റെ സവിശേഷതകള്‍ പഠിക്കുന്നതും ഈ വികിരണങ്ങളലുള്ള പഠനം വഴിയാണ്. 1965 ല്‍ അര്‍നോ പെന്‍സിയാസ്, റോബര്‍ട്ട് വില്‍സന്‍ എന്നീ ശാസ്ത്രജ്ഞര്‍ ആക്‌സ്മികമായാണ് ഈ വികിരണങ്ങള്‍ കണ്ടെത്തുന്നത്. മഹാവിസ്‌ഫോടനത്തിന്റെ അവശിഷ്ട ഊര്‍ജ്ജമെന്ന് കരുതപ്പെടുന്ന പരഭാഗ വികിരണങ്ങളെ ദൃശ്യപ്രകാശത്തെക്കാള്‍ ഉയര്‍ന്ന തരംഗദൈഘ്യമുള്ള മൈക്രാവേവ് ശ്രേണിയിലാണ് ഉള്‍പ്പെടുത്തിയിരിക്കുന്നത്. പ്രപഞ്ചത്തിന്റെ എല്ലാ കോണുകളില്‍ നിന്നും ഈ വികിരണങ്ങള്‍ ഭൂമിയിലെത്തുന്നുണ്ട്. വളരെ താഴ്ന്ന ഊര്‍ജ്ജ നിലയിലുള്ള ഇവയെ കുറിച്ച് കൃത്യമായ പഠനം നടത്തുക വളരെ പ്രയാസമാണ്. നാസയുടെ കോബി(Cosmic Microwave Background Explorer-COBE), ഡബ്ല്യു-മാപ്(Wilkinson Microwave Anisotropy Prob-WMAP) എന്നീ സ്‌പേസ് ക്രാഫ്റ്റുകള്‍ പരഭാഗവികിരണങ്ങളില്‍ പഠനം നത്തിയിട്ടുണ്ട്. ഈ പഠനങ്ങളില്‍ ഏറ്റവും ആധുനികവും വ്യക്തവുമായ ചിത്രം നല്‍കുന്നത് പ്ലാങ്ക് സ്‌പേസ് ക്രാഫ്റ്റാണ്.

പ്ലാങ്ക് സ്‌പേസ്ക്രാഫ്റ്റ്

യൂറോപ്യന്‍ സ്‌പേസ് ഏജന്‍സിയുടെ നിയന്ത്രണത്തിലുള്ള ബഹിരാകാശ പര്യവേഷണ നിലയമാണ് പ്ലാങ്ക് സ്‌പേസ് ക്രാഫ്റ്റ്. ജര്‍മന്‍ ഭൗതീക ശാസ്ത്രജ്ഞനായ മാക്‌സ് പ്ലാങ്കിന്റെ സ്മരണയിലാണ് ഈ ബഹിരാകാശ പേടകത്തിന് പ്ലാങ്ക് എന്ന് നാമകരണം ചെയ്തിട്ടുള്ളത്. പരഭാഗവികിരണങ്ങളുടെ അപശ്രുതികള്‍ നിരീക്ഷിക്കുന്നതിനുവേണ്ടി സവിശേഷമായി രൂപകല്‍പ്പന നിര്‍വഹിച്ച ഈ പേടകം 2009 മെയ് 14നാണ് വിക്ഷേപിച്ചത്. ഭൂമിയുടെ അടുത്തായിരിക്കുമ്പോള്‍(perigee) 270 കിലോമീറ്ററും അകലെയായിരിക്കുമ്പോള്‍ (apogee)11,20,000 കിലോമീറ്ററുള്ള ഒരു അതിദീര്‍ഘ വൃത്തപഥമാണ് പ്ലാങ്കിനായി സജ്ജീകരിച്ചിട്ടുള്ളത്. പ്ലാങ്ക് സ്‌പേസ് ക്രാഫ്റ്റ് ശേഖരിച്ച വിവരങ്ങളുടെ അടിസ്ഥാനത്തില്‍ 2013 മാര്‍ച്ച് 21ന് പ്രപഞ്ചയത്തിന്റെ പ്രായവും ദ്രവ്യ -ഊര്‍ജ്ജ അനുപാതവും പുനര്‍നിര്‍ണയിക്കുകയുണ്ടായി. ഇതനുസരിച്ച് പപഞ്ചത്തിന്റെ പ്രായം 1382 കോടി വര്‍ഷമായി തിരുത്തിവായിക്കണം. സാധാരണ ദ്രവ്യം 4.9 ശതമാനവും ശ്യാമദ്രവ്യം 26.8 ശതമാനവും ശ്യാമഊര്‍ജ്ജം 68.3 ശതമാനവുമാണെന്നാണ് പുതിയ കണ്ടെത്തല്‍. പ്രപഞ്ചവികാസ നിരക്ക് (ഹബിള്‍സ്ഥിരാങ്കം) മുമ്പ് കരുതിയിരുന്നതിലും കുറവാണെന്നതും കണ്ടെത്തിയിരുന്നു.

നാലുവര്‍ഷത്തെ പ്രവര്‍ത്തനത്തിനൊടുവില്‍ 2013 ഒക്ടോബര്‍ 23ന് ഗ്രൗണ്ട് സ്‌റ്റേഷനില്‍ നിന്നും സ്‌പേസ് ക്രാഫ്റ്റിലേക്കുള്ള അവസാന സന്ദേശവും നല്‍കിക്കഴിഞ്ഞു. പ്രപഞ്ചത്തിന്റെഭൂതകാലത്തിലേക്ക് തുറന്നുപിടിച്ച കണ്ണുകളായതുകൊണ്ടാണ് പ്ലാങ്ക് സ്‌പേസ് ക്രാഫ്റ്റിനെ ‘കോസ്മിക് ടൈം മെഷീന്‍’ എന്ന് വിളിക്കുന്നത്. പ്ലാങ്ക് ശേഖരിച്ച വിവരങ്ങള്‍ പൂര്‍ണമായി അപഗ്രഥിച്ചുകഴിഞ്ഞിട്ടില്ല. ഇപ്പോള്‍ തന്നെ പ്ലാങ്കിന്റെ കണ്ടെത്തിലിന് ‘ഫന്റാസ്റ്റിക്’ എന്ന വിശേഷണമാണ് നാസയിലെ ശാസ്ത്രജ്ഞര്‍ നല്‍കിയിരിക്കുന്നത്. നാം അനന്തമെന്നുംവിശാലമെന്നും കരുതുന്ന ഈ പ്രപഞ്ചം ശതകോടിക്കണക്കിന് പ്രപഞ്ചങ്ങളിലൊന്ന് മാത്രമായിരിക്കാം. പരമ്പരാഗത ഏക പ്രപഞ്ചമാതൃകയില്‍ നിന്ന് നമ്മുടെ ഭൗതീകശാസ്ത്ര പാഠപുസ്തകങ്ങള്‍ ഇനി മള്‍ട്ടേിവേര്‍സുകളുടെ അനന്ത സാധ്യതയിലേക്ക് വളരുമെന്ന കാര്യത്തില്‍ സംശയമില്ല.


📁 ഡോ സാബു ജോസ്

 208 കാഴ്ച ; പുതിയ ആലേഖനങ്ങൾ അറിയിക്കുന്നതിന് താഴെയുള്ള ബെൽ അടയാളം അമർത്തുക

മറുപടി രേഖപ്പെടുത്തുക

താങ്കളുടെ ഇമെയില്‍ വിലാസം പ്രസിദ്ധപ്പെടുത്തുകയില്ല. അവശ്യമായ ഫീല്‍ഡുകള്‍ * ആയി രേഖപ്പെടുത്തിയിരിക്കുന്നു